На Мартин му се пријаде Бурек. Сега да сум дома во Скопје само ќе посакав и во првата пекара ќе му купев бурек каков сакам, со месо, сирење, зелка, праз, а има и пица бурек. Го јадеме за појадок. Има да се купи на секој чекор. Миризбата те мами рано наутро од пекарите кога сите брзаат за на работа.Го јадеме со јогурт. Е тука во Будимпешта нема! Не можам да ги купам вкусовите од дома и да сакам.Затоа ќе ги засукам ракавите, ќе испрочитам 100 рецепти, ќе се јавам на мајка ми за уште еднаш да ми потврди и ќе го направам. Морам да ви признаам дека секогаш го менувам рецептот. Не дека не е добар или се сомневам, ама јас точно знам каков вкус сакам. На пример сега го изменив рецептот за корите. Пишуваше 500гр., јас ги намалив на 300 гр.Сакам повеќе фил, а помалку тесто.Треба и искуство не велам не. Теорија е важна, ама без пракса ништо. Колкупати ми се случило да го утнам, а се правам како што треба. Но, никогаш не се откажувам. Пак истиот рецепт ќе го направам се додека не го усовршам.
